កម្ពុជានឹងដាក់ការពិភាក្សាពីជម្លោះខ្មែរ-ថៃនៅក្នុងកិច្ចប្រជុំកំពូលអាស៊ាន

មន្រ្តីជាន់ខ្ពស់នៃរាជរដ្ឋាភិបាលខ្មែរ ថ្លែងនៅថ្ងៃទី១៤ ខែតុលានេះថា កម្ពុជានឹងដាក់ការពិភាក្សាអំពីជម្លោះខ្មែរ-ថៃនៅក្នុងកិច្ចប្រជុំកំពូលអាស៊ានលើកទី១៥ នៅប្រទេសថៃ នាពេលឆាប់ៗខាងមុខនេះ។

ឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេសខ្មែរ លោក ហោ ណាំហុង បានថ្លែងនៅព្រឹកថ្ងៃ១៤ តុលាថា កម្ពុជានឹងដាក់ការពិភាក្សាស្តីពីជម្លោះខ្មែរ-ថៃ នៅក្នុងកិច្ចប្រជុំកំពូលអាស៊ាន នៅហួរហ៊ីន ប្រទេសថៃ នាពេលខាងមុខនេះ បើទោះបីជាថៃមានគោលបំណងបង្កើតយន្តការមជ្ឈត្តកម្ម មានន័យថា អង្គការអព្យាក្រឹតដើម្បីដោះស្រាយបញ្ហាខ្មែរ-ថៃនេះក៏ដោយ។

មានប្រសាសន៍នៅក្នុងសន្និសីទកាសែតនៅក្រសួងការបរទេស លោករដ្ឋមន្ត្រី ហោ ណាំហុង ថ្លែងបញ្ជាក់ថា កម្ពុជាបានធ្វើលិខិតផ្លូវការសុំឲ្យដាក់បញ្ហាជម្លោះខ្មែរ-ថៃ នៅក្បែរតំបន់ប្រាសាទព្រះវិហារក្នុងការជជែកក្នុងកិច្ចប្រជុំកំពូលអាស៊ាន ដែលមានថៃជាប្រធានសមាគមអាស៊ាន នឹងធ្វើជាម្ចាស់ផ្ទះក្នុងកិច្ចប្រជុំឆ្នាំនេះផង។ លោកបន្តថា ភាគីថៃបែរជាមិនឆ្លើយតប ហើយគេបែរជាឮដំណឹងមកវិញថា ថៃបានផ្លាស់ប្តូរជំហរ ដោយចង់បង្កើតឲ្យមានការអនុម័តក្នុងកិច្ចប្រជុំកំពូលអាស៊ាននៅហួរហ៊ីន សម្រាប់បង្កើតយន្តការមជ្ឈត្តកម្ម ក្នុងការដោះស្រាយវិបត្តិនេះទៅវិញ។

លោក ហោ ណាំហុង បានថ្លែងយ៉ាងដូច្នេះ ៖ «បញ្ហាទំនាស់កម្ពុជាថៃនេះ បញ្ហាព្រំដែន ជាបញ្ហាសំខាន់ យើងមិនអាចដោះស្រាយតាមអ្នកនាំពាក្យបានទេ មិនអាចដោះស្រាយតាមអ្នកសារព័ត៌មានបានទេ»។
លោកបានថ្លែងបន្តទៀតថា យន្តការមជ្ឈត្តកម្មក្នុងការដោះស្រាយរឿងទឹកដីជារឿងធំធេង មិនមាននៅក្នុងធម្មនុញ្ញរបស់អាស៊ានឡើយ ដូច្នេះហើយកម្ពុជានៅតែរក្សាជំហរដដែល បើទោះបីជាភាគីថៃ មិនឆ្លើយតបទៅនឹងសំណូមពររបស់ខ្មែរក៏ដោយ។

កាលពីពេលថ្មីៗនេះ កាសែតបាងកកប៉ុស្តិ៍របស់ថៃ បានស្រង់សម្ដីលោករដ្ឋមន្ត្រីក្រសួងការបរទេសថៃ លោក Kashit Phirom (កាស៊ីត ភិរម្យ)ថា ថៃមានបំណងសុំឲ្យប្រទេសអាស៊ានបង្កើតយន្តការមជ្ឈត្តកម្មនៃអង្គការអព្យាក្រឹត ដើម្បីដោះស្រាយវិវាទខ្មែរ-ថៃ នៅក្បែរតំបន់ប្រាសាទព្រះវិហារ។

ការផ្សព្វផ្សាយដូច្នេះ ត្រូវបានភាគីខ្មែរចោទថា ថៃកំពុងផ្លាស់ប្តូរជំហរភ្លាមៗ ដែលគេមិនអាចទទួលបាន។
ជាមួយគ្នានេះដែរ លោករដ្ឋមន្ត្រីបានព្រមានថា កម្ពុជាបានអត់ធ្មត់ចំពោះការចង់ដោះស្រាយទ្វេភាគីជាមួយថៃជាអតិបរមារួចមកហើយ ហើយគេនឹងត្រៀមខ្លួនប្តឹងទៅអង្គការអន្តរជាតិ បើសិនជានៅតែមិនអាចទៅរួច។
លោករដ្ឋមន្រ្តីក្រសួងការបរទេស ហោ ណាំហុង មានប្រសាសន៍ថា ៖ «ដល់ពេលណាមួយនោះនឹងលើកបញ្ហានេះទៅដោះស្រាយនៅវេទិកាអន្តរជាតិ គ្រាន់តែចៀសវាងយ៉ាងម៉េចកុំឲ្យមានការប៉ះទង្គិចខាងយោធា ចៀសវាងកុំឲ្យមានការហូរឈាម»។

ទីប្រឹក្សាអមស្ថានទូតថៃ លោក Suwat Kaowsook (ស៊ូវ៉ាត កែវស៊ូក) ថ្លែងបញ្ជាក់ថា ថៃនៅតែរក្សាជំហរក្នុងការព្យាយាមដោះស្រាយដោយសន្តិវិធីដដែល។ លោកច្រានចោលថា ការផ្សព្វផ្សាយតាមកាសែតកន្លងមកនេះជាការភ័ន្តច្រឡំ។
គួរជម្រាបជូនថា ជម្លោះខ្មែរ-ថៃ នៅតំបន់ប្រាសាទព្រះវិហារបានអូសបន្លាយជាច្រើនខែរួចមកហើយ ដែលម្តងម្កាលមានការប៉ះទង្គិចដោយអាវុធផងដែរ។

ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានសាទរចំពោះជំហររបស់ខ្មែរ ដែលប៉ុនប៉ងឲ្យអន្តរជាតិ ក៏ដូចជាសមាគមអាស៊ានដោះស្រាយរឿងនេះ៕