ចលនានិស្សិតខ្មែរដើម្បីប្រជាធិបតេយ្យ

ប្រមូលផ្តុំទិន្នន័យ និង រាល់ព័ត៌មានផ្សេងដោយមជ្ឈមណ្ឌលវិទ្យាសាស្រ្តជំនាញកុំព្យូទ័រ ៕សូមថ្លែងអំណរអរគុណចំពោះប្រិយមិត្តដែលបានចំណាយពេលវេលាដ៏មានតំលៃចូលមកកាន់ គេហទំព័ររបស់មជ្ឈមណ្ឌលយើងខ្ញុំ ដែលមានទីតាំងនៅក្នុងបរិវេណវត្តនរាធិបតី ខាងត្បូងអង្គការសហសង្រ្គោះកម្ពុជា SCC ចំងាយប្រហែល៥០ម៉ែត្រ៕ សូមអភ័យទោសរាល់កំហុសឆ្គងដែលមាននៅក្នុងកូនគេហទំព័រនេះ និងរង់ចាំទទួលនូវមតិរិះក្នុងន័យស្ថាបនាទាំងអស់គ្នា ៕ ទាំងអស់គ្នាដើម្បីបច្ចេកវិទ្យា បច្ចេកវិទ្យាដើម្បីទាំងអស់គ្នា ៕

Tuesday, September 1, 2009

រដ្ឋមន្ត្រីព័ត៌មាននឹងដឹកនាំប្រតិភូទៅធ្វើបុណ្យនៅកម្ពុជា ក្រោម

នៅចុងសបា្ដហ៍ទីមួយនៃខែកញ្ញានេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាននៃប្រទេសកម្ពុជានឹងដឹកនាំមន្ត្រីរាជការនៃក្រសួងព័ត៌មានទៅធ្វើបុណ្យនៅខេត្តមួយក្នុងទឹកដីកម្ពុជាក្រោម។

រដ្ឋាភិបាលកម្ពុជាមានគ្រោងបញ្ជូនជាលើកដំបូងនូវប្រតិភូចំនួន១៥០នាក់ នៅថៃ្ងទី៥ ខែកញ្ញា ខាងមុខនេះ ទៅកាន់ខេត្តត្រាវិញ ហៅជាភាសាវៀតណាម និងដែលកំពុងកាន់កាប់ដោយប្រទេសវៀតណាម ឬហៅថា ខេត្តព្រះត្រពាំង អតីតទឹកដីខែ្មរកម្ពុជាក្រោម សម្រាប់រយៈពេល២ថៃ្ង នៅដើមខែកញ្ញា ដើម្បីចូលរួមកាន់បិណ្ឌនៅទីនោះនិងសែ្វងយល់អំពីការពិតអំពីស្ថានភាពរស់នៅរបស់គ្រួសារខែ្មរកម្ពុជាក្រោមនៅទីនោះ។

លោក ខៀវ កាញារីទ្ធ ជាមន្រ្តីអ្នកនាំពាក្យរបស់រាជរដ្ឋាភិបាលកម្ពុជានិងជារដ្ឋមន្រ្តីក្រសួងព័ត៌មានផងដែរនោះ ដែលនឹងដឹកនាំប្រតិភូចំនួន១៥០នាក់ ទៅកាន់អតីតទឹកដីខែ្មរកម្ពុជាក្រោមនាពេលខាងមុខនេះ បានមានប្រសាសន៍ប្រាប់វិទ្យុអាស៊ីសេរីនៅថៃ្ងច័ន្ទ ទី៣១ ខែសីហា ថា យើងទៅកាន់បិណ្ឌនៅក្នុងវត្តចំនួន២ គឺវត្តអង្គរបុរី និងវត្តកំពង់ឈូក នៅក្នុងខេត្តត្រាវិញ ឬខេត្តព្រះត្រពាំងដែលមានចំណាស់ជាង ១.០០០ឆ្នាំមកហើយ។

លោក ខៀវ កាញារីទ្ធ មានប្រសាសន៍ដូច្នេះថា ៖ «យើងចង់រៀបចំជាពិធីកាន់បិណ្ឌមួយ ដោយមន្រ្តីរាជការក្រសួងព័ត៌មានហ្នឹង ហើយក៏មានអ្នកកាសែតទូរទស្សន៍ទាំងអស់មួយចំនួនធំនៅប្រទេសកម្ពុជាយើង ដើម្បីទៅផ្សាភ្ជាប់និស្ស័យផង ក៏ដើម្បីស្វែងយល់ពីគ្នាទៅវិញទៅមកផង។ យើងចង់ឲ្យប្រជាជនខ្មែរកម្ពុជាក្រោមយល់ថា រដ្ឋាភិបាលមិនដែលព្រងើយកន្តើយអំពីស្ថានភាពរបស់បងប្អូននៅកម្ពុជាក្រោម»។

លោកបានមានប្រសាសន៍បញ្ជាក់ថា ការចាកចេញដំណើរនឹងចាប់ផ្តើមនៅព្រលឹមថៃ្ងសៅរ៍ ទី៥ ខែកញ្ញា និងវិលត្រទ្បប់មកវិញនៅថៃ្ងអាទិត្យ ទី៦ ខែកញ្ញា តាមរយៈរថយន្តធំចំនួន៣គ្រឿង ចេញពីទីក្រុងភ្នំពេញ ទៅកាន់ខេត្តព្រះត្រពាំងនោះ។

ព្រះភិក្ខុ ថាច់ វិមាន ជាអ្នកនាំពាក្យនៃសហព័ន្ធខែ្មរកម្ពុជាក្រោមពិភពលោកប្រចាំនៅក្នុងប្រទេសកម្ពុជា បានមានពុទ្ធដីកាស្វាគមន៍ថា វាជាសញ្ញាល្អនៃការយកចិត្តទុក្ខដាក់របស់រដ្ឋាភិបាលកម្ពុជា ដោយព្រះអង្គបានស្នើសុំឲ្យរដ្ឋាភិបាលកម្ពុជាទៅធ្វើទស្សនកិច្ចដូចគ្នានេះនៅខេត្តឃ្លាំងនិងខេត្តមាត់ជ្រូក នៅថៃ្ងអនាគត។

ព្រះតេជគុណ ថាច់ វិមាន មានពុទ្ធដីកាដូច្នេះថា ៖ «យ៉ាងណាមិញ គឺថាខ្មែរទាំងអស់គ្នា ខ្មែរក្រោម ខ្មែរលើ ខ្មែរកណ្ដាល ជាខ្មែរតែមួយ បើសិនណា លោក ខៀវ កាញារីទ្ធ មានមនោសញ្ចេតនាដ៏បរិសុទ្ធ អាត្មាមានការត្រេកអរ ហើយយ៉ាងណាមិញ លោកទៅហ្នឹងអាចយល់បានខ្លះៗអំពីជីវភាពរស់នៅពិតប្រាកដរបស់បងប្អូនខ្មែរកម្ពុជាក្រោម»។

ព្រះភិក្ខុមួយអង្គ គង់នៅក្នុងវត្តគងជ័យ នៅក្នុងខេត្តត្រាវិញ ឬខេត្តព្រះត្រពាំង ជាអតីតទឹកដីខែ្មរកម្ពុជាក្រោម បានមានពុទ្ធដីកាតាមទូរស័ព្ទមកថា ព្រះអង្គមានការសប្បាយរីករាយចំពោះការកាន់បិណ្ឌនេះ។

សូមជម្រាបថា ប្រភពនិងឯកសារនានារបស់សហគមន៍ខ្មែរកម្ពុជាក្រោម បានឲ្យដឹងថា ទឹកដីខែ្មរកម្ពុជាក្រោម ដែលមានខេត្តចំនួន២១ខេត្ត ត្រូវបានអាណានិគមនិយមបារាំងកាត់ឲ្យទៅវៀតណាមគ្រប់គ្រងតាំងពីថៃ្ងទី៤ ខែមិថុនា ឆ្នាំ១៩៤៩ ដោយគ្មានការយល់ព្រមពីប្រជាពលរដ្ឋជាម្ចាស់ទឹកដីទ្បើយ។

ក្រោយពីទឹកដីនេះត្រូវបានកាន់កាប់ដោយវៀតណាម សកម្មជនការពារសិទ្ធិមនុស្សនៃខែ្មរកម្ពុជាក្រោមបានរាយការណ៍ជាបន្តបន្ទាប់ថា មានការគាបសង្កត់បិទសិទ្ធិសេរីភាពក្នុងជំនឿសាសនាតាមបែបប្រពៃណីខែ្មរនិងអក្សរសាស្រ្តខែ្មរជាដើម មកលើពលរដ្ឋខ្មែរកម្ពុជាក្រោមនោះ៕

Monday, August 24, 2009

ស្ថានភាពគ្រោះទឹកជំនន់នៅខែត្រភាគឦសាន

អាជ្ញាធរនៅខេត្តភាគឦសានប្រទេសជាប់តាមដងទន្លេមេគង្គបានឲ្យដឹងថា ឆ្នាំនេះពុំមានមនុស្សស្លាប់ដោយសារគ្រោះទឹកជំនន់ឡើយ ហើយផលដំណាំក៏ប៉ះពាល់តិចជាងឆ្នាំទៅដែរ បើទោះបីជាទឹកទន្លេមេគង្គមានការជន់ជោរខ្ពស់ជាងឆ្នាំទៅក៏ដោយ។

អភិបាលខេត្តស្ទឹងត្រែង គឺលោក ឡូយ សូផាត បានឲ្យដឹងថា ទឹកជំនន់ទន្លេមេគង្គឆ្នាំនេះមានភាពធំជាងឆ្នាំទៅ ដោយទឹកបានឡើងហួសកំណត់ត្រូវប្រកាសអាសន្នដែលគេកំណត់ត្រឹម១១ម៉ែត្រ ហើយឡើងដល់ទៅជា១២ម៉ែត្រកាលពីថ្ងៃទី៥ សីហា ដែលធ្វើឲ្យលិចភូមិមួយចំនួនក្នុងស្រុកសៀមប៉ាង។

លោក ឡូយ សូផាត បានមានប្រសាសន៍ថា ៖ «ទឹកហ្នឹងវាលិចច្រើនគួរសមដែរ ប៉ុន្តែទឹកហ្នឹងវាស្រកទៅវិញលឿន។ ការខូចខាតយើងឃើញមានខូចស្រូវ... លិចដល់ទៅជាង៤០០ហិកតារមែន ប៉ុន្តែវាខូចមិនលើសពី១០%ឬ១០%ជាងតែប៉ុណ្ណឹង»។

លោកអភិបាលខេត្ត ឡូយ សូផាត បានបញ្ជាក់បន្ថែមថា ពុំមានគ្រោះថ្នាក់ដល់ជីវិតមនុស្សទេ ហើយពេលនេះលោកកំពុងត្រួតពិនិត្យដីស្រែដែលលិចទឹកដើម្បីសង្គ្រោះ។

នៅឯខេត្តក្រចេះវិញ ក្នុងរយៈកាលទឹកជំនន់កន្លងទៅត្រូវបានលោក ធុន គ្រី អភិបាលរងខេត្ត ឲ្យដឹងថា ទឹកមានសភាពធំជាងឆ្នាំទៅមែន តែពុំបណ្តាលឲ្យមានគ្រោះថ្នាក់ដល់ជីវិតមនុស្សនិងសត្វនិងបំផ្លាញដំណាំកសិផលឡើយ។

លោក ធុន គ្រី បានបញ្ជាក់ថា ៖ «ទឹកឡើង វាប៉ះពាល់ការលិចលង់ដែរ ប៉ុន្តែវាអត់មានផលប៉ះពាល់ដល់រលួយដំណាំអីអត់ទេ បើរយៈពេលខ្លី ព្រោះតាមរបាយការណ៍តាមបណ្ដាស្រុក ក៏ដូចជាការពិនិត្យទៅតាមកន្លែងដែលធ្លាប់រងការលិចលង់ហ្នឹងដែរ»។

លោក ឈន ម៉ាគីលីន មន្ត្រីធនធានទឹកខេត្តក្រចេះបានឲ្យដឹងថា កាលពីឆ្នាំទៅទឹកឡើងខ្ពស់បំផុតមានត្រឹមតែ២០,៤៥ម៉ែត្រ តែឆ្នាំនេះទឹកហាក់ដូចជាមានកម្ពស់ដល់ទៅ២០,៤៨ម៉ែត្រ តែក៏នៅតែពុំទាន់ដល់កម្រិតប្រកាសភាពអាសន្នគឹ ២១ម៉ែត្រនោះឡើយដែរ ហើយនៅថ្ងៃអាទិត្យ ទី២៣ សីហា ទឹកក៏បានស្រកនៅត្រឹមកម្ពស់១៧,២៤ម៉ែត្រ ដែលលោកថាជាការស្រកលឿនជាងឆ្នាំទៅ។

លោក ឈន ម៉ាគីលីន បានឲ្យដឹងថា ៖ «ឆ្នាំទៅវាឡើងតែ២០,៤៥ម៉ែត្រទេ ថ្ងៃ១៣។ រួចដល់ពេលអានេះវានៅក្នុងដូចដើមខែ៨ហ្នឹងដូចគ្នា ២០,៤៨(ម៉ែត្រ) គ្រាន់តែសភាពដែលវាស្រកហ្នឹងវាលឿនជាងឆ្នាំទៅ។ ឆ្នាំទៅដល់ថ្ងៃនេះវានៅត្រឹមកម្រិត១៩ម៉ែត្រជាង វានៅខ្ពស់ជាងឆ្នាំនេះ ឆ្នាំនេះ ថ្ងៃនេះ វា១៧,២៤(ម៉ែត្រ)»។

ការស្រកចុះលឿននៃទឹកទន្លេមេគង្គបែបនេះនាំឲ្យមានការព្រួយបារម្ភពីសំណាក់អាជ្ញាធរខេត្តក្រចេះ ដោយខ្លាចក្រែងកើតមានគ្រោះរាំងស្ងួតក្នុងមុខរបររបស់អ្នកស្រុកទៅវិញបន្ទាប់ពីគេសង្កេតឃើញភ្លៀងរាំងជាច្រើនថ្ងៃមក៕

ក្មេង៣នាក់ត្រូវរន្ទះបាញ់ស្លាប់នៅខេត្តបាត់ដំបង

យ៉ាងហោចណាស់ មានក្មេង៣នាក់នៅភូមិតែមួយបានស្លាប់ភ្លាមៗ និងកេ្មងប្រុសម្នាក់ទៀត បានរងគ្រោះធ្ងន់ដោយសាររន្ទះបាញ់ទម្លាក់ពីលើដើមឈើ ខណៈដែលក្មេងៗទាំង៤នាក់ បានឡើងបេះផ្លែដង្កោ នៅមុនពេលមេឃភ្លៀងបន្តិចក្នុងខេត្តបាត់ដំបង។

មេឃុំរបស់មង្គល លោក ទូច ហឹម បានថ្លែងប្រាប់នៅព្រឹកថ្ងៃអាទិត្យ ទី២៣ ខែសីហា ថា គ្រោះថ្នាក់ដោយសាររន្ទះបាញ់ខាងលើបានកើតឡើង កាលពីរសៀលម៉ោង ៣ និង ៣០នាទី នាថ្ងៃសៅរ៍ ទី២២ ខែសីហា ឆ្នាំ២០០៩ នៅភូមិព្រៃព្រំ២ ឃុំរបស់មង្គល ស្រុកមោងឫស្សី ខេត្តបាត់ដំបង។

លោក ទូច ហឹម មានប្រសាសន៍ដូច្នេះថា ៖ «បាញ់មុនភ្លៀង គ្រាន់តែចាប់រលឹមតិចៗមក រន្ទះមកបណ្តោយ ម៉ោងប្រហែលជា ៣កន្លះ ហើយក្មេងហ្នឹងវាទៅឡើងបេះផ្លែដង្កោ ឡើងទៅ ៤នាក់ ដល់ពេលរន្ទះបាញ់ទៅ វាងាប់បីនាក់ធ្លាក់មក ម្នាក់នៅរស់យកទៅមន្ទីរពេទ្យ»។

លោកបន្តថា ក្មេងទាំងបីនាក់នោះ មានឈ្មោះ ឃាន ខុន ភេទស្រី អាយុ ១៤ឆ្នាំ ឈ្មោះ សៀក សុខ ចាន់ ភេទស្រី អាយុ១៤ឆ្នាំ ឈ្មោះ ខេង ទា អាយុ ៨ឆ្នាំ ស្លាប់ និង ឈ្មោះ ហាត ហឿន ភេទប្រុស អាយុ៨ឆ្នាំ រងរបួសធ្ងន់ កំពុងសង្គ្រោះនៅមន្ទីរពេទ្យបង្អែក ស្រុកមោងឫស្សី។

លោកបន្តថា ក្មេងប្រុសស្រីទាំង៤នាក់ មានលំនៅនៅភូមិព្រៃព្រំ១ ឃុំរបស់មង្គល ស្រុកមោងឫស្សី ជាមួយគ្នា។

ប្រធានមន្ទីរធនធានទឹកនិងឧតុនិយមខេត្តបាត់ដំបង លោក ឡុង ផលគុណ បានឲ្យដឹងថា កន្លងមក ខាងមន្ទីរនិងអង្គការ Jica របស់ជប៉ុន បានសហការគ្នាដោយបានបោះពុម្ពសៀវភៅយល់ដឹងពីគ្រោះថ្នាក់ដោយសាររន្ទះបាញ់នេះ។ ហើយសៀវភៅទាំងនោះ បានផ្តល់ទៅឲ្យអាជ្ញាធរមូលដ្ឋានដើម្បីអប់រំប្រជាពលរដ្ឋឲ្យចេះការពារខ្លួននៅពេលមានមេឃភ្លៀងផ្គរ។

ជាមួយគ្នានេះ លោកបានអំពាវនាវឲ្យប្រជាពលរដ្ឋមានការប្រុងប្រយ័ត្ន ៖ «ពេលភ្លៀង យើងគួរកុំចេញទៅក្រៅផ្ទះសម្បែង ប្រជាជនយើងភាគច្រើន ពេលភ្លៀងពេលអី គាត់លេងក្មេងៗច្រើនជិះលេង តាមផ្ទះទីធ្លាមានទឹកដក់ ពេលភ្លៀងយើងមិនគួរណាបណ្តោយអ៊ីចឹងទេ សត្វពាហនៈក៏អ៊ីចឹងដែរ គេឲ្យចូលទីណាមានជម្រកបាំងជិតកុំឲ្យខ្លួនយើង កាលណាមានផ្លេកបន្ទោរ រន្ទះអីអ៊ីចឹងទៅ វាឆ្លងតាមរយៈទឹកភ្លៀងដែលយើងជាន់អីហ្នឹង»។

អាជ្ញាធរមូលដ្ឋានឃុំរបស់មង្គលបានឲ្យដឹងទៀតថា កាលពីពាក់កណ្តាលខែសីហា ឆ្នាំ២០០៩ បុរសម្នាក់ ឈ្មោះ ប៊ុន ឆោម អាយុ៥៧ឆ្នាំ រស់នៅភូមិអង្គ ឃុំតាពូង ស្រុកថ្មគោល ក៏ត្រូវបានរន្ទះបាញ់ស្លាប់ ខណៈធ្វើដំណើរត្រឡប់មកពីធ្វើសែ្រវិញ។

ចំណែកឯមេឃុំជ្រោយស្ដៅ ជាមួយគ្នានេះដែរ កាលពីថ្ងៃសៅរ៍ ទី១១ ខែមេសា បុរសពីរនាក់នៅភូមិនិគមក្នុង ឃុំជ្រោយស្តៅ ស្រុកថ្មគោល ខេត្តបាត់ដំបង ក៏ទទួលរងគ្រោះស្លាប់ដោយសាររន្ទះបាញ់។

ជនរងគ្រោះត្រូវបានរន្ទះបាញ់ស្លាប់ ខណៈដែលកំពុងអង្គុយមើលទូរទស្សន៍នៅក្រោមផ្ទះ និងម្នាក់ទៀត ត្រូវបានរន្ទះបាញ់ស្លាប់ ខណៈដែលកំពុងបើកបរម៉ាស៊ីនគោយន្តច្នៃទៅវាលស្រែ។

ប្រភពដដែលបានបន្ថែមឲ្យដឹងថា នៅក្នុងខេត្តបាត់ដំបង គិតថ្ងៃសៅរ៍ ខែមេសាដើមឆ្នាំ រហូតដល់ថ្ងៃសៅរ៍ ទី២២ ខែសីហា ឆ្នាំ២០០៩ មានប្រជាពលរដ្ឋក្នុងខេត្តចំនួន ៦នាក់ហើយ ដែលរងគ្រោះដោយសាររន្ទះបាញ់៕

Thursday, August 20, 2009

បទសម្ភាសន៍ទាក់ទងនឹងកម្ពុជាជំពាក់ប្រាក់បរទេស

កន្លងមកមានសេចក្តីរាយការណ៍ថា ប្រទេសកម្ពុជាជំពាក់ប្រាក់បរទេសរាប់ពាន់លានដុល្លារសហរដ្ឋអាមេរិក។

គឹមពៅ ៖ ខ្ញុំទទួលបានដំណឹងថា ឯកឧត្ដមទើបនឹងបានទទួលនូវឯកសារមួយស្ដី អំពីកម្ពុជា ដែលជំពាក់បំណុលគេ។ តើមកដល់ពេលនេះឯកឧត្ដមអាចឲ្យដឹងថា កម្ពុជាយើងជំពាក់បំណុលគេប៉ុន្មានទៅហើយ ហើយជាពិសេសយើង ជំពាក់ប្រទេសណាខ្លះ?

សុន ឆ័យ ៖ យើងបានទទួលលិខិតផ្លូវការ លិខិតនេះផ្ញើមករដ្ឋសភាតាំងតែ ពីខែ ធ្នូ ឆ្នាំ ២០០៨។ ក្នុងរបាយការណ៍គឺមានការបញ្ជាក់ពីការជំពាក់លុយបរទេស គឺមានចំនួន ២.៦៩៣លានដុល្លារសហរដ្ឋអាមេរិក។ ហើយបើយើងគិត មកដល់ពេលនេះ គិតតាមតួលេខដែលប៉ាន់ស្មាន ថាប្រហែលជា ៣ពាន់លាន(ដុល្លារ)ហើយ ដែលយើងជំពាក់បរទេស។ ហើយទឹកប្រាក់នេះ គឺជាទឹកប្រាក់មួយដែលខ្ញុំមានការព្រួយបារម្ភ ថាអាចនឹងផ្ដល់ស្ថានភាពមួយដែលខាងផ្នែកស្ថានប័នហិរញ្ញវត្ថុអន្តរជាតិ គេប្រហែលជាបន្តិចទៀត គេឈប់ឲ្យយើងខ្ចីទៀតហើយ ពីព្រោះវាដល់កម្រិតមួយដែលគេមិនជឿជាក់ថាយើងនឹងអាចសងគេបាន។

គឹមពៅ ៖ ខ្ញុំចង់ជម្រាបសួរឯកឧត្ដមបន្តទៀត អំពីរឿងដែលយើងខ្ចីបុលគេ មកទល់ថ្ងៃហ្នឹងមានចំនួនដល់តែជាង ៣ពាន់លាន(ដុល្លារ) បើប្រៀបធៀបទៅនឹងការអភិវឌ្ឍនៅក្នុងស្រុកហ្នឹងវាសមរម្យទេ?

សុន ឆ័យ ៖ យើងឃើញថាមានអំពើពុករលួយទៅលើប្រាក់ដែលយើងខ្ចីនេះ ព្រោះប្រាក់ខ្ចីហើយនិងប្រាក់ដែលយើងទទួលអំណោយវាមានលក្ខណៈខុសគ្នា។ អំណោយដែលគេមិនទារយកវិញនោះ គឺគេមានក្រុមតាមមើលគុណភាពពេលខ្លះដែរ ដូចជាការសង់ស្ពានជ្រោយចង្វា។ ឯលុយកម្ចី គឺដោយសារយើងជាអ្នកខ្ចី ហើយយើងយកមកធ្វើការសាងសង់ដោយខ្លួនយើង យើងឃើញថាមិនមានគុណភាពទេ។ ហើយគុណភាពផ្លូវបើយើងប្រៀបធៀបនឹងសហរដ្ឋអាមេរិក ដែលគេធ្វើមានតម្លៃប្រហាក់ប្រហែលគ្នា ផ្លូវគេអាចមានការធានាយ៉ាងតិចណាស់ក៏ ៣០ឆ្នាំដែរក្នុងការប្រើប្រាស់។ ប្រទេសយើង ផ្លូវខ្លះគឺមានអាយុបាន ២ឆ្នាំ ខ្លះស្ទើរតែមួយឆ្នាំឃើញខ្ទេចខ្ទីអស់ ហើយជាបញ្ហាដែលយើងថាបន្តិចទៀត ខ្ញុំបានជម្រាបខាងដើម គេលែងឲ្យយើងខ្ចី ហើយយើងអស់មានលទ្ធភាពខ្ចី គឺយើងនៅតែអត់មានផ្លូវប្រើប្រាស់ លុយក៏យើងជំពាក់គេថែមទៀត។ ឆ្នាំ ១៩៩៧ គេថាបើរដ្ឋាភិបាលចង់បានលុយ ឬខ្ចីលុយគេ សភាទាមទារថាឲ្យធ្វើគម្រោងឲ្យសភាមើល តើសង់អីពិតប្រាកដ? តើត្រឹមត្រូវឬទេ? ប៉ុន្តែក្រោយឆ្នាំ ១៩៩៧ មក រដ្ឋាភិបាលថាពិបាកណាស់ទម្រាំបានសិទ្ធិពីសភា ម៉្លោះហើយសុំឲ្យជាកញ្ចប់ ហើយកញ្ចប់នេះធ្វើឲ្យរដ្ឋាភិបាលអត់ត្រូវការសួរសភាទេ គឺលោកត្រូវបែងចែកខ្ចីគេអីទាក់ទងយកទៅសម្បើមណាស់។

គឹមពៅ ៖ ឯកឧត្ដម តើប្រាក់កម្ចីទាំងអស់ហ្នឹង តើយើងចាំបាច់ត្រូវតែសងគេ ឬ ទេ?

សុន ឆ័យ ៖ យើងត្រូវតែសងគេ។ យើងឃើញហើយប្រទេសទាំងឡាយដែលគេធ្លាប់ឲ្យលុយយើងខ្ចីពីដើមមក ក្រោយមកនៅពេលដែលយើងជួបប្រទះនូវសង្រ្គាម ការប្រល័យពូជសាសន៍អីហ្នឹង មានប្រទេសខ្លះគេអនុគ្រោះឲ្យយើង ដោយសារថាយើងមានបញ្ហាហ្នឹង។ ឯប្រទេសខ្លះគេមាននយោបាយគេតឹងរ៉ឹងណាស់ មាន យូកូស្លាវី ថ្ងៃមុនគាត់មកទារត្រង់ៗតែម្ដង។ ហើយខ្ញុំមិនជឿថា ចាប់ពីឆ្នាំ ១៩៩៣ មក លុយដែលជំពាក់គេប្រហែលគេមិនអនុញ្ញាតឲ្យយើងទៅងាយស្រួលទេ ដោយសារយើងមានធនធានធម្មជាតិដែលគេសម្លឹងឃើញ។ យើងឃើញហើយការឲ្យលុយខ្ចី កម្រិតនៃការឲ្យលុយខ្ចី សព្វថ្ងៃវាលើសកម្រិតដែលយើងអាចមានលទ្ធភាពសងហើយ បើប្រៀបធៀបទៅនឹងប្រាក់ផលិតផលសរុបក្នុងស្រុក ដែលភាសាកាត់ថា ផ.ស.ស ឬភាសាអង់គ្លេសថា GDP នោះ។

គឹមពៅ ៖ សូមជម្រាបសួរឯកឧត្ដមថា តើនរណាទទួលខុសត្រូវក្នុងរឿងសងគេត្រឡប់ទៅវិញហ្នឹង?

សុន ឆ័យ ៖ រឿងហ្នឹងជាបន្ទុករបស់ពលរដ្ឋ។ រដ្ឋាភិបាលអាចផ្លាស់ប្ដូរបាន ដូចយើងឃើញហើយ លុយដែលរុស្ស៊ីទារយើងហ្នឹង ខ្ចីតាំងពីរបបមុនម្ល៉េះ មិនត្រឹមតែរដ្ឋាភិបាលទេ និយាយពីរបបទៅទៀត។ នេះជាការបង្ហាញថានរណាសង? មិនមែនរដ្ឋាភិបាលលើកមុននោះសងឯណា ពលរដ្ឋហ្នឹងហើយដែលជាអ្នកសង។ ដូច្នេះបានជាខ្ញុំបែងចែកទៅពលរដ្ឋហ្នឹង ខ្ញុំថា ៣០០ដុល្លារសហរដ្ឋអាមេរិក ក្នុងម្នាក់ដែលជំពាក់គេ ហ្នឹងត្រូវដឹង ហើយសូមឲ្យយើងដែលទាំងរដ្ឋាភិបាល ទាំងពលរដ្ឋហ្នឹង គឺថាត្រូវចូលរួមគ្នាពិនិត្យ។

គឹមពៅ ៖ ជុំវិញប្រាក់បំណុលដែលកម្ពុជា ជំពាក់គេច្រើន តើឯកឧត្ដមក្នុងនាមជាតំណាងរាស្រ្ដមួយរូបហ្នឹង គ្រោងនឹងមានផែនការអ្វីទេ?

សុន ឆ័យ ៖ ដូចបានជម្រាបបន្តិចមុនថា ខ្ញុំនឹងធ្វើលិខិតអញ្ជើញឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ មកឆ្លើយបំភ្លឺនៅរដ្ឋសភា។ ទី១ គឺឲ្យគាត់បញ្ជាក់មក តើរដ្ឋាភិបាលនៅមានគម្រោងខ្ចីបុលគេប៉ុន្មានទៀតទៅអនាគតហ្នឹង? ដើម្បីឲ្យយើងត្រៀមខ្លួនផង។ តើយើងម្នាក់ៗ ដូចខ្ញុំបានជម្រាបហ្នឹង ឥឡូវម្នាក់ៗ ទាំងខ្ញុំ ទាំងពលរដ្ឋនៅស្រែចម្ការដែលមិនដែលឃើញលុយដុល្លារសោះហ្នឹង ជំពាក់គេជាង ៣០០(ដុល្លារ)ម្នាក់ហើយ។ ឥឡូវយើងចង់ដឹងថា ប្រុងត្រៀមប៉ុន្មានទៀត? ហើយយើងនឹងទៅជាអ្នកជំពាក់គេហ្នឹងប៉ុន្មាន? ហើយចង់បញ្ជាក់លទ្ធភាពរបស់យើងផង ក្នុងការប្រមូលធនធាន ហើយកាត់បន្ថយការរំពឹងតែទៅលើជំនួយ ការខ្ចីបុល តើយើងអាចមានវិធានការអីទេ? ដូច្នេះបានជាថាចៀសវាងកុំឲ្យប្រទេសជាតិយើងធ្លាក់ទៅក្នុងភក់ជ្រាំដ៏លំបាកទៅអនាគត។
ហើយកូនចៅយើងត្រូវសងបំណុលគេមិនចេះចប់ហ្នឹង ការយល់របស់ខ្ញុំ ថាត្រូវតែពង្រឹងវិស័យការពារ ប្រឆាំងនឹងអំពើពុករលួយឲ្យបានឆាប់ ហើយធ្វើយ៉ាងម៉េចឲ្យគម្រោងនៃលុយកាក់ដែលយើងអាចនៅខ្ចីគេបាន ឬក៏លុយកាក់ដែលយើងយកទៅកសាងសមិទ្ធផលហ្នឹង ធ្វើម៉េចឲ្យមានគុណភាព ធានាសេចក្ដីត្រូវការរបស់ប្រជាពលរដ្ឋយើងឲ្យបានត្រឹមត្រូវ ទុកឱកាសឲ្យអ្នកដឹកនាំក្រោយគេមានលទ្ធភាពទៅខ្ចីបុលមកប្រើប្រាស់ផង៕

ការិយាល័យសិទ្ធិមនុស្សអ.ស.ប.ប្រតិកម្មនឹងសាលក្រមតុលាការរឿង មូរ សុខហួរ

ការិយាល័យរបស់អង្គការសហប្រជាជាតិខាងសិទ្ធិមនុស្សនៅកម្ពុជាបានចេញសេចក្តីថ្លែងការណ៍មួយនៅថ្ងៃពុធ ទី៥ ខែសីហា ចាត់ទុកថា សាលក្រមរបស់តុលាការក្រុងភ្នំពេញដែលផ្តន្ទាទោសលោកស្រី មូរ សុខហួរ ហាក់ដូចជាមិនស្របតាមធម្មនុញ្ញនិងបទដ្ឋានជាអន្តរជាតិស្តីពីសេរីភាពក្នុងការសម្តែងមតិនោះទេ។

សេចក្តីថ្លែងការណ៍ដែលចេញដោយការិយាល័យនៃឧត្តមស្នងការទទួលបន្ទុក សិទ្ធិមនុស្សប្រចាំកម្ពុជារបស់អង្គការសហប្រជាជាតិនេះ គឺបានធ្វើឡើងមួយថ្ងៃបន្ទាប់ពីលោកស្រី មូរ សុខហួរ ជាតំណាងរាស្ត្រគណបក្សសមរង្ស៊ីត្រូវតុលាការក្រុងភ្នំពេញសម្រេចឲ្យលោកស្រីចាញ់ក្តី និងបង់ប្រាក់ផាកពិន័យចំនួន១៦លាន៥សែនរៀលក្នុងរឿងក្តីបរិហារកេរ្តិ៍លោកនាយករដ្ឋមន្ត្រី ហ៊ុន សែន។

លោក ផៃ ស៊ីផាន ជាអ្នកនាំពាក្យនិងជារដ្ឋលេខាធិការទីស្តីការគណៈរដ្ឋមន្ត្រី មានប្រសាសន៍ថា វាជាការមិនត្រឹមត្រូវទេដែលអង្គការសហប្រជាជាតិថ្លែងថា កម្ពុជាប្រើប្រព័ន្ធតុលាការដើម្បីកម្រិតសេរីភាពនៃការបញ្ចេញមតិនោះ។
លោក ផៃ ស៊ីផាន បានបញ្ជាក់ថា ៖ «មើលករណីទាំងពីរទាំងបីនេះ គឺមិនមែន ការបញ្ចេញមតិទេ។ គឺទី១ រវាងករណីរបស់លោកជំទាវ មូរ សុខហួរ មិនមែនជាការបញ្ចេញមតិទេ ជាការវាយប្រហារ ជាការកៀរគរមតិអន្តរជាតិឬមតិ ជាតិ ក្នុងការវាយប្រហារមកលើសម្ដេច ហ៊ុន សែន»។

លោក ផៃ ស៊ីផាន ថ្លែងបន្តថា ការដែលអង្គការសហប្រជាជាតិអាចធ្វើសេចក្តីថ្លែងការណ៍បាននេះ គឺមានន័យបញ្ជាក់និងបង្ហាញថា កម្ពុជាបើកសិទ្ធិសេរីភាពពេញលេញឲ្យមានការបញ្ចេញមតិ។

លោក ផៃ ស៊ីផាន បានមានប្រសាសន៍ថា ៖ «ក៏ប៉ុន្តែសិទ្ធិសេរីភាពរបស់បុគ្គលម្នាក់មិនអាចទៅរំលោភលើបុគ្គលម្នាក់ទៀតទេ។ ទី២ តុលាការហ្នឹងនីតិរដ្ឋត្រឹមត្រូវ យើងមានចៅក្រមរបស់យើង យើងមានមេធាវីរបស់យើងដើម្បីមកអនុវត្តនីតិរដ្ឋនេះឯង»។

ក៏ប៉ុន្តែអ្នកនាំពាក្យគណបក្សសមរង្ស៊ីគឺលោកតំណាងរាស្ត្រ យឹម សុវណ្ណ ថ្លែងថា សាលក្រមថ្មីៗនេះគឺបង្ហាញយ៉ាងច្បាស់អំពីភាពមិនឯករាជ្យរបស់តុលាការខ្មែរ ហើយបញ្ហាប៉ះពាល់ធ្ងន់ធ្ងរនោះគឺកម្ពុជាទាំងមូល។

លោក យឹម សុវណ្ណ បានថ្លែងថា ៖ «រឿងលោកជំទាវ មូរ សុខហួរ វាជារឿងមួយ ប៉ុន្តែ រឿងធំជាងនេះទៅទៀត គឺរឿងប្រជាពលរដ្ឋខ្មែរត្រូវតែរងគ្រោះដោយសារប្រព័ន្ធតុលាការនេះ គឺរឿងដែលអន្តរជាតិ អ្នកវិនិយោគទុនល្អៗដែលមានលុយ រាប់រយរាប់ពាន់លានដុល្លារ គេមិនហ៊ានមករកស៊ីទេ។ ដូច្នេះរឿងផលប្រយោជន៍ប្រទេសជាតិយើង កិត្តិយសប្រទេសជាតិយើង ប៉ះពាល់ធំបំផុតដោយសារតែប្រព័ន្ធតុលាការមិនមានភាពឯករាជ និងមិនកាត់សេចក្ដីទៅតាមគតិយុត្តិធម៌នេះឯង»។

សូមជម្រាបថា សេចក្តីថ្លែងការណ៍ដែលចេញដោយការិយាល័យនៃឧត្តមស្នងការទទួលបន្ទុកសិទ្ធិមនុស្សប្រចាំកម្ពុជារបស់អង្គការសហប្រជាជាតិ ក៏បានលើកឡើងអំពីសាលក្រមផ្តន្ទាទោសដាក់ពន្ធនាគារនិងផាកពិន័យជាប្រាក់ក្នុងករណីលោក មឿង សុន ជាប្រធានអង្គការមូលនិធិទ្រទ្រង់អរិយធម៌ខ្មែរ និងលោក ហង្ស ចក្រា ជានិពន្ធនាយកកាសែតខ្មែរម្ចាស់ស្រុក ផងដែរ ថា ផលប៉ះពាល់នៃការផ្តន្ទាទោសនោះគឺអាចនាំឲ្យសាធារណជនលែងហ៊ានជជែកពិភាក្សាគ្នាអំពីបញ្ហាសំខាន់ៗទាក់ទងនឹងផលប្រយោជន៍សាធារណៈក៏ដូចជាកាត់បន្ថយកម្រិតសេរីភាពនៃការបញ្ចេញមតិនៅកម្ពុជា៕

អាជ្ញាធរបើកការស៊ើបអង្កេតស្វែងរកអ្នកបាចត្រាក់ប្រឆាំង ហ៊ុន សែន

សមត្ថកិច្ចនគរបាលរាជធានីភ្នំពេញកំពុងតែបើកការស៊ើបអង្កេតជាបន្ទាន់មួយនៅថៃ្ងពុធ ទី១៩ ខែសីហា ដើម្បីស្វែងរកជនសង្ស័យដែលបានបាចត្រាក់ក្នុងទីក្រុងភ្នំពេញក្នុងការជេរប្រមាថលោកនាយករដ្ឋមន្រ្តី ហ៊ុន សែន និងរដ្ឋាភិបាល ហើយបានចោទប្រកាន់ថា ថៃ្ង៧ មករា ជាថៃ្ងយួនឈ្លានពានកម្ពុជា។

លោក ទូច ណារ៉ុថ ស្នងការនគរបាលរាជធានីភ្នំពេញ បានមានប្រសាសន៍ប្រាប់វិទ្យុអាស៊ីសេរីនៅថៃ្ងពុធ ទី១៩ ខែសីហា ថា សមត្ថកិច្ចរបស់លោកកំពុងតែបើកកិច្ចស្រាវជា្រវហើយនាពេលនេះ ដោយមិនទាន់អាចសន្និដ្ឋានបានថា មុខសញ្ញានៃជនសង្ស័យនោះជាក្រុមណាទេ។

លោកបានបន្តថា ៖ «ខ្ញុំដំណើរការស្រាវជ្រាវ បើសិនជារកឃើញខ្ញុំនឹងបញ្ជូនគាត់ទៅតុលាការដើម្បីចាត់ការ។ ប្រជាជនគាត់មើលឃើញនឹងភ្នែក គាត់មិនជឿទៅលើជនអគតិមួយចំនួនដែលបំភ្លៃការពិតអ៊ីចឹងទេ»។ ប្រភពដដែលបានបញ្ជាក់ថា ត្រាក់នោះមានចំនួនច្រើនដុំដែលប្រជាពលរដ្ឋបានប្រទះឃើញនិងបានប្រគល់ឲ្យសមត្ថកិច្ច។ ត្រាក់នេះត្រូវបានគេប្រទះឃើញនៅវេលាម៉ោង៤ជិតភ្លឺនៅក្នុងខណ្ឌដូនពេញ។

ផ្អែកតាមប្រភពបានឲ្យដឹងថា ត្រាក់នោះគឺមានរូបថតរបស់លោកនាយករដ្ឋមន្រ្តី ហ៊ុន សែន និងមានខ្លឹមសារសរសេរអក្សរថា នេះគឺជាមេដឹកនាំ ផ្តាច់ការនៃប្រទេសកម្ពុជាដែលជាកញ្ជះដាច់ថៃ្លរបស់អាយ៉ងយួន។

នៅក្នុងចំណុចសំខាន់នៃឃ្លានានាជាច្រើននិងមានខ្លឹមសារសរសេរជាអក្សរថា "ខ្ញុំមានមោទនភាពណាស់ដែលបានកើតមកជាកូនខ្មែរ គឺពូជខែ្មរសាងអង្គរ។ ខ្ញុំនឹកឃើញយុគសម័យប្រទេសខែ្មរដ៏រុងរឿងល្បីល្បាញ ខ្ទរខ្ទារទូទាំងពិភពលោក តែពេលនេះរលាយអស់ហើយ ដោយសារតែរបបផ្តាច់ការរបស់រដ្ឋាភិបាលសព្វថៃ្ងនេះ។ អំពើពុករលួយនិងការឈ្លានពានពីសំណាក់យួន ហាណូយ នៅថៃ្ងទី៧ ខែមករា ឆ្នាំ១៩៧៩ ដោយប្រើពាក្យថា វាមករំដោះកូនខែ្មរនិងរំដោះប្រជាជនខែ្មរ"។ ត្រាក់នោះបានដាក់ឈ្មោះថា ប៉ាន់ សុវណ្ណី, កុស ឯវុទ្ធី, កឹម សុភ័ក្រ្ត, ជា សុជាប និង ជឹម ធឿន។

លោក យឹម សុវណ្ណ តំណាងរាស្រ្តគណបក្សសមរង្ស៊ី និងជាអ្នកនាំពាក្យផងដែរនោះ បានមានប្រសាសន៍ថា លោកសង្ស័យថាវាជាលេសអ្វីមួយ។
លោក យឹម សុវណ្ណ បានបញ្ជាក់ថា ៖ «អត់មានពាក់ព័ន្ធអីនឹងគណបក្សសមរង្ស៊ីទេ និយាយឲ្យមែនទែនទៅ បើសិនជានរណាគេចង់ចោទប្រកាន់អីគ្មានការពាក់ព័ន្ធអីទាំងអស់ ពីព្រោះនេះជាឆាកល្ខោនមួយដែលគេរៀបចំឡើងសម្រាប់លេងសើច គេចង់ចោទប្រកាន់ ប៉ុន្តែគ្មានពាក់ព័ន្ធទេ»។

លោក អំ សំអាត ប្រធានផែ្នកស៊ើបអង្កេតនៃអង្គការសិទ្ធិមនុស្សក្រៅរដ្ឋាភិបាលមួយ ហៅកាត់ថា លីកាដូ បានមានប្រសាសន៍ថា ៖ «យើងក៏មិនទាន់ដឹងថា បញ្ហាទាំងអស់នេះចេញមកពីអ្នកណាម្នាក់ទេ។ អ៊ីចឹងគួរតែធ្វើការស៊ើបអង្កេតរកអ្នកដែលបង្កើតនូវបញ្ហាទាំងអស់នេះ»។

សូមជម្រាបថា កាលពីដើមឆ្នាំ២០០៩កន្លងទៅនេះ សមត្ថកិច្ចរបស់អគ្គស្នងការនគរបាលជាតិកម្ពុជាបានចាប់ខ្លួនជនសង្ស័យចំនួនប្រមាណ៦នាក់ ក្រោមបទចោទថាបានដាក់បង្កៃគ្រាប់បែកច្នៃចំនួន២គ្រាប់មិនទាន់ផ្ទុះ នៅខាងមុខទីស្តីការគណៈរដ្ឋមន្រ្តី និងនៅក្បែរស្ថានីយទូរទស្សន៍ប៉ុស្តិ៍លេខ៣ នៅក្នុងទីក្រុងភ្នំពេញ កាលពីថៃ្ងទី២ ខែមករា ដើមឆ្នាំ២០០៩ កន្លងទៅនេះ នៅមុនពេលគណបក្សប្រជាជនកម្ពុជាកំពុងកាន់អំណាចបានបា្ររព្ធខួបលើទី៣០ឆ្នាំ នៃថៃ្ងរំដោះ ៧មករា ពីរបបខែ្មរក្រហមនោះ៕

Saturday, July 11, 2009

Prince To Seek "Unity" in Third Royal Party

Prince To Seek 'Unity' in Third Royal Party
By Chun Sakada, VOA KhmerOriginal report from Phnom Penh09 September 2008

Prince Sisowath Thomico says he is seeking to keep royal family members politically relevant.

[Editor's note: With two fractured royalist parties coming out of the national election, Prince Sisowath Thomico, a cousin of King Norodom Sihamoni, says he has a plan to revive the royal name. With Norodom Ranariddh running his self-named party from exile, and Funcinpec winning only two seats in July's election, Prince Thomico has announced he wants to established a unifying party. He sat for an interview with VOA Khmer at his cabinet office at the Royal Palace in Phnom Penh.]

"I want to remind people of the royalist stance. Currently, the principle of the royalists is not interpreted clearly. That's why the voice of royalists has been disqualified and there is disunity among the royalists. Because there is no clear ideology, no clear theory, no clear principle, and no clear stance. Right now the royalist side has only individual principles, individual theories, and individual stances"

"My stance is that the royal family and the royalists can join in unity under the king and the government to show the national problem"

Q. You have a plan to set up a new political party, following the formation of a new government later this month. What is the main purpose of this party?

A. I have a plan to find a way not to disqualify the voice of the royalists. And I must set up a new party, but it is not clear how I can set up the new party.

Q. How will you set up the new party?

A. I want to remind people of the royalist stance. Currently, the principle of the royalists is not interpreted clearly. That's why the voice of royalists has been disqualified and there is disunity among the royalists. Because there is no clear ideology, no clear theory, no clear principle, and no clear stance. Right now the royalist side has only individual principles, individual theories, and individual stances.

Q. You set up the Sangkum Jatiniyum Front Party in 2006, but later you gave up on the party and joined the Norodom Ranariddh Party, and then Funcinpec. Why do you want a new party?

A. Because now Funcinpec and the Norodom Ranariddh Party have weakened, endangering the Cambodian royal family in politics. I recognize my political process failed in unifying the royalists. I also recognize I lost to [NRP Secretary-General] You Hockry and [Funcinpec Secretary-General] Nhiek Bunchhay, who are the leaders disunifying the royalists. I cannot let the royalists lose. I must find a way to put value to the royal family and royalists once again.

Q. How will your planned party help promote the honor and prestige of the royal family and the royalists in the Cambodian political arena?

A. When the Khmer royal family becomes the national symbol, especially in the political sense, and when the royal family serves the king to protect the national culture and works hard to show the big national problem. I hope to do so. I hope and believe all walks of Khmer citizens can unify together to protect the border, sovereignty and culture. My stance is that the royal family and the royalists can join in unity under the king and the government to show the national problem.