ចលនានិស្សិតខ្មែរដើម្បីប្រជាធិបតេយ្យ

ប្រមូលផ្តុំទិន្នន័យ និង រាល់ព័ត៌មានផ្សេងដោយមជ្ឈមណ្ឌលវិទ្យាសាស្រ្តជំនាញកុំព្យូទ័រ ៕សូមថ្លែងអំណរអរគុណចំពោះប្រិយមិត្តដែលបានចំណាយពេលវេលាដ៏មានតំលៃចូលមកកាន់ គេហទំព័ររបស់មជ្ឈមណ្ឌលយើងខ្ញុំ ដែលមានទីតាំងនៅក្នុងបរិវេណវត្តនរាធិបតី ខាងត្បូងអង្គការសហសង្រ្គោះកម្ពុជា SCC ចំងាយប្រហែល៥០ម៉ែត្រ៕ សូមអភ័យទោសរាល់កំហុសឆ្គងដែលមាននៅក្នុងកូនគេហទំព័រនេះ និងរង់ចាំទទួលនូវមតិរិះក្នុងន័យស្ថាបនាទាំងអស់គ្នា ៕ ទាំងអស់គ្នាដើម្បីបច្ចេកវិទ្យា បច្ចេកវិទ្យាដើម្បីទាំងអស់គ្នា ៕

Wednesday, September 23, 2009

រដ្ឋាភិបាលប្តេជ្ញារកយុត្តិធម៌ឲ្យយុវជនកម្ពុជា ដែលត្រូវទាហានថៃដុតទាំងរស់

ដោយ លី ម៉េងហួរ
អត្ថបទចុះផ្សាយកាលពីថ្ងៃទី 17/09/2009 កែប្រែលើកចុងក្រោយកាលពីថ្ងៃទី 17/09/2009 11:41 ម៉ោងសកល

អ្នកនាំពាក្យក្រសួងការបរទេសថៃ បានច្រានចោលចំពោះដំណឹង ស្តីពី ការដុតយុវជនខ្មែរទាំងរស់ នៅព្រំដែនខេត្តឧត្តរមានជ័យ។ ការបដិសេធនេះ បានធ្វើឡើង បន្ទាប់ពីក្រសួងការបរទេសកម្ពុជា ធ្វើកំណត់ទូត ដាក់ទៅកាន់ភាគីថៃ ដោយមានទាំងរូបថត បង្ហាញថា ទាហានថៃបានបាញ់យុវជនកម្ពុជាម្នាក់អាយុ១៦ឆ្នាំ ឲ្យរងរបួស ហើយបានដុតសម្លាប់ទាំងរស់ កាលពីថ្ងៃទី១១កញ្ញា។

ទាហានឈុតខ្មៅសៀមនៅ ព្រំដែនព្រះវិហារ(រូបថត ៖ Reuters)
អ្នកនាំពាក្យក្រសួងការបរទេសថៃ បានអះអាងថាទាហានឈុតខ្មៅថៃ មិនបានបាញ់ និងដុតសម្លាប់យុវជនកម្ពុជា ដែលកាប់ឈើខុសច្បាប់ តាមព្រំដែនកម្ពុជាថៃ ក្នុងខេត្តឧត្តរមានជ័យឡើយ។

អ្នកនាំពាក្យក្រសួងការបរទេសថៃ ត្រូវបានកាសែតស្រង់សម្តីថា ក្រោយពីទាក់ទងជាមួយនឹងការិយាល័យកិច្ចការព្រំដែនថៃរួចមក ក្រសួងការបរទេសថៃ រកឃើញថា របាយការណ៍ស្តីពីការបាញ់ និងដុតយុវជនខ្មែរទាំងរស់នោះ មិនមានមូលដ្ឋានច្បាស់លាស់ទេ។ ក៏ប៉ុន្តែអ្នកនាំពាក្យរូបនេះ បានបញ្ជាក់ថា ទាហានថៃក្នុងខេត្តសុរិន្ទ កាលពីថ្ងៃ១១កញ្ញា អាទិត្យមុន បានបាញ់រះឡើងលើ បន្ទាប់ពីទទួលដំណឹងថា មានយុវជនកម្ពុជាប្រមាណ ៨ នាក់ បានលបចូលទឹកដីថៃ ដើម្បីកាប់ឈើ។

ការបដិសេធរបស់ក្រសួងការបរទេសថៃបែបនេះ បានធ្វើឡើងភ្លាមៗ បន្ទាប់ពីក្រសួងការបរទេសកម្ពុជា កាលពីថ្ងៃទី១៤កញ្ញា បានធ្វើកំណត់ទូត ដាក់ទៅកាន់ក្រសួងការបរទេសថៃ ដោយថ្កោលទោស ចំពោះអំពើអមនុស្សធម៌របស់ទាហានឈុតខ្មៅថៃ ដែលបានបាញ់ និងដុតសម្លាប់យុវជនកម្ពុជាម្នាក់ទាំងរស់ នៅព្រំដែនខេត្តឧត្តរមានជ័យ។

បន្ថែមលើសពីនេះ នៅថ្ងៃពុធម្សិលមិញ រដ្ឋលេខាធិការក្រសួងការបរទេស លោក អ៊ុច បូររិទ្ធ បានបញ្ជាក់ថា រឿងទាហានថៃដុតយុវជនខ្មែរទាំងរស់ គឺជាការពិត ព្រោះមានរូបថត កាកសំណល់ឆ្អឹង និងចំណងដែលជាប់នឹងដៃ ជាភស្ថុតាង។

តាមមន្ត្រីការទូតកម្ពុជា គឺមិនទាន់មានលិខិតឆ្លើយតបជាផ្លូវការពីក្រសួងការបរទេសថៃ នៅឡើយទេ នៅក្នុងរឿងទាហានថៃដុតយុវជនកម្ពុជា។ តែទោះជាយ៉ាងណា លោក អ៊ុច បូររិទ្ធ បានបញ្ជាក់ថា រដ្ឋាភិបាលនឹងមិនបញ្ឈប់ការតវ៉ា និងការទាមទាររកយុត្តិធម៌ឲ្យស្របតាមច្បាប់អន្តរជាតិ និងច្បាប់មនុស្សធម៌ឡើយ។

លោក អ៊ុច បូររិទ្ធ បានបញ្ជាក់ពីសំណូមពរដាច់ខាតរបស់កម្ពុជា គឺរដ្ឋាភិបាលថៃ ចាំបាច់ត្រូវតែស៊ើបអង្កេត និងចាប់អ្នកប្រព្រឹត្តមកដាក់ទណ្ឌកម្មឲ្យបាន។

ក្នុងរឿងទាហានថៃដុតយុវជនកម្ពុជាម្នាក់ អាយុ១៦ឆ្នាំ ក៏ត្រូវបានមេដឹកនាំគណបក្ស ជំទាស់ សមរង្ស៊ី និងសង្គមស៊ីវិលនៅកម្ពុជា បញ្ចេញប្រតិកម្មយ៉ាងខ្លាំងក្លា និងចាត់ទុក ជាអំពើអមនុស្សធម៌។ លោក សម រង្ស៊ី និងសង្គមស៊ីវិល បានអំពាវនាវឲ្យចាប់ខ្លួនទាហានថៃ អ្នកប្រព្រឹត្តដើម្បីកាត់ទោសតាមច្បាប់៕

កម្ពុជាថ្កោលទោសអំពើយង់ឃ្នងរបស់ទាហានថៃ

ដោយ លាង ដឺលុច
អត្ថបទចុះផ្សាយកាលពីថ្ងៃទី 15/09/2009 កែប្រែលើកចុងក្រោយកាលពីថ្ងៃទី 15/09/2009 12:31 ម៉ោងសកល

ក្រសួងការបរទេសកម្ពុជាបានធ្វើកំណត់ទូតមួយ កាលពីថ្ងៃចន្ទម្សិលមិញ ផ្ញើទៅក្រសួងការបរទេសថៃ ថ្កោលទោសអំពើអមនុស្សធម៌របស់ទាហានឈុតខ្មៅថៃ ដែលបានដុតខ្លួនក្មេងប្រុសកម្ពុជាទាំងរស់ នៅព្រំដែនខេត្តឧត្តរមានជ័យ។

ក្រសួងការបរទេសខ្មែរបានធ្វើកំណត់ទូតមួយផ្ញើទៅក្រសួងការបរទេសថៃ នៅថ្ងៃចន្ទ ម្សិលមិញ ចាត់ទុកអំពើដុតកុមារខ្មែរទាំងរស់ថា ជាការរំលោភយ៉ាងធ្ងន់ធ្ងរទៅលើគោលការណ៍មនុស្សធម៌អន្តរជាតិ ហើយក៏បានរំលោភទៅលើកំណត់ហេតុកិច្ចប្រជុំគណៈកម្មការចម្រុះកម្ពុជា-ថៃផងដែរ។

កំណត់ទូតរបស់រដ្ឋាភិបាលកម្ពុជា ដែលត្រូវផ្ញើទៅក្រសួងការបរទេសថៃបានស្នើឲ្យអាជ្ញាធរពាក់ព័ន្ធរបស់ថៃចាត់វិធានការទប់ស្កាត់អំពើអមនុស្សធម៌បែបនេះកុំឲ្យកើតមានឡើងសាជាថ្មីទៀត ហើយនិងនាំខ្លួនជនប្រព្រឹត្តអំពើឃោរឃៅមកផ្តន្ទាទោសតាមច្បាប់។

ប្រតិកម្មរបស់រដ្ឋាភិបាលកម្ពុជាកើតមានឡើង ក្រោយពេលដែលមានព្រឹត្តិការណ៍ដ៏សោកសង្រេងមួយរបស់កុមារខ្មែរម្នាក់ កាលពីចុងសប្តាហ៍កន្លងទៅ។ កាលពីថ្ងៃសុក្រ ទី១១ ខែកញ្ញា នៅវេលាថ្ងៃត្រង់ អ្នកភូមិ ដែលស៊ីឈ្នួលកាប់អុស ចំនួន១០នាក់បានទទួលរងការដេញបាញ់ប្រហារពីសំណាក់ទាហានឈុតខ្មៅថៃ នៃខេត្តសុរិន្ទ ខាងកើតច្រកព្រំដែនអូរស្មាច់។ ក្នុងចំណោមជនរងគ្រោះពីរនាក់ដោយសារគ្រាប់កាំភ្លើងរបស់ទាហានថៃ យុន រិទ្ធ ភេទប្រុស អាយុ១៦ឆ្នាំ ត្រូវទាហានថៃចាប់ខ្លួនបាន ហើយយកទៅចងផ្អោបជាប់នឹងរទេះអូសឈើ២គ្រឿង មុននឹងចាក់ប្រេងសាំងដុតសម្លាប់ទាំងរស់។

សំណល់សាកសពជនរងគ្រោះ ដែលសល់តែក្បាល ត្រូវបានអ្នកភូមិ និងអាជ្ញាធរការពារព្រំដែនកម្ពុជារកឃើញ នៅក្នុងគំនរភ្នក់ភ្លើង កាលពីថ្ងៃអាទិត្យ ទី១៣ កញ្ញា។ ជាច្រើនឆ្នាំមកហើយ សារព័ត៌មានក្នុងស្រុកតែងតែមានការផ្សព្វផ្សាយ អំពីការធ្វើទុក្ខបុកម្នេញពីទាហានថៃមកលើប្រជាពលរដ្ឋខ្មែរ ដែលរកស៊ីតាមព្រំដែន និងឆ្លងទៅធ្វើការ នៅលើទឹកដីថៃ។ ការបាញ់សម្លាប់ប្រជាពលរដ្ឋខ្មែរ ក្រោមលេសថា ចូលក្នុងទឹកដីថៃដោយខុសច្បាប់ ការរត់ពន្ធគ្រឿងញៀនមិនមែនទើបតែកើតឡើងជាលើកដំបូងនោះឡើយ។

លោកចាន់ សុវេត មន្ត្រីតាមដានការគោរពសិទ្ធិមនុស្សរបស់សមាគមការពារសិទ្ធិមនុស្ស អាដហុក បានថ្លែងថា តាមរយៈការកត់ត្រារបស់សមាគមអាដហុក ក្នុងមួយឆ្នាំៗ អំពើរំលោភសិទ្ធិមនុស្ស ដែលប្រព្រឹត្តឡើងដោយអាជ្ញាធរថៃ មកលើប្រជាពលរដ្ឋខ្មែរ មានមិនតិចជាង១០ករណីទេ។ លោកចាន់ សុវេត បានស្នើឲ្យអាជ្ញាធរថៃពិចារណា អំពីការប្រព្រឹត្តរបស់ខ្លួន ដែលនាំឲ្យប៉ះពាល់ដល់ទំនាក់ទំនងទ្វេភាគីនៃប្រទេសជិតខាងទាំងពីរ និងដែលអាចបង្កឲ្យមានការគុំគួនរវាងប្រជាជនទាំងពីរទៀតផង៕

ពលរដ្ឋនៅបាត់ដំបងទាមទារឲ្យបង្ក្រាបបទល្មើសនេសាទខុសច្បាប់

ក្រុមអ្នកតវ៉ាជាច្រើនរយនាក់តំណាងឲ្យប្រជាពលរដ្ឋ៤ភូមិ និងអាជ្ញាធរមូលដ្ឋាន បានកំណត់យកថ្ងៃទី២៣ ខែកញ្ញាខាងមុខនេះ ដើម្បីចុះបង្ក្រាបបទល្មើសនេសាទខុសច្បាប់ ដែលកំពុងកើតមានជាហូរហែក្នុងផ្ទៃបឹង ស្ថិតនៅភូមិសាស្ត្រឃុំកំពង់ព្រៀង ស្រុកសង្កែ ខេត្តបាត់ដំបង។

ការព្រមព្រៀងគ្នានេះ ធ្វើឡើង បន្ទាប់ពីក្រុមអ្នកតវ៉ា ជិត១០០នាក់មកពីភូមិចំនួន៤ក្នុងឃុំ បានលើកគ្នាធ្វើបាតុកម្មនៅខាងមុខសាលាឃុំកំពង់ព្រៀង នាព្រឹកថ្ងៃច័ន្ទ ទី២១ ខែកញ្ញា ដើម្បីទាមទារឲ្យអាជ្ញាធរជលផលនិងមន្ត្រីមូលដ្ឋានចុះបង្ក្រាបបទល្មើសនេសាទខុសច្បាប់។

លោក សោម សារិទ្ធិ តំណាងក្រុមអ្នកតវ៉ាបានថ្លែងថា ការដាក់អួនក្រឡាញឹក ឬហៅថា ណររ៉ាវ មានប្រវែងចាប់ពី ៥០០ម៉ែត្រឡើងទៅ ប្រហែល៣០កន្លែង ត្រូវបានជនល្មើសដាក់ចាប់ត្រីនៅពេញផ្ទៃទឹកបឹង ត្រង់ភូមិសាស្ត្រព្រៃរនាមក្រោម ក្នុងឃុំកំពង់ព្រៀង ស្រុកសង្កែ ខេត្តបាត់ដំបង ៖ «មិនបាច់ចាំអាជ្ញាធរចុះបង្ក្រាបក៏បាន សុំសិទ្ធិឲ្យប្រជាពលរដ្ឋបង្ក្រាបផ្ទាល់តែម្តង ពីខែ៩ រហូតដល់ខែ១១ គឺសុំឲ្យប្រជាពលរដ្ឋចុះចូលរួមផ្ទាល់តែម្ដង ព្រោះរយៈកាលកន្លងមក អាជ្ញាធរថាបង្ក្រាប តែមិនបានបង្ក្រាបទេ គឺកាន់តែកើនឡើង»។

លោក ម៉ឹង នី ក្នុងចំណោមអ្នកតវ៉ាជិត ១០០នាក់ បានបន្ថែមថា៖ «ខ្ញុំឃើញទាំងប៉ូលិស ទាំងក្រសួងជំនាញគេចុះទៅហ្នឹង គេចុះទៅកាត់៤ម៉ែត្រ ៥ម៉ែត្រ ១០ម៉ែត្រ គេទៅទៀតទៅ។ មួយថ្ងៃទៅពីរបីកន្លែង ទៅធ្វើអីកើត»។

ប្រភពពីក្រុមអ្នកភូមិបានថ្លែងថា បទល្មើសនេសាទខាងលើនេះកំពុងគំរាមកំហែងទៅដល់ធនធានមច្ឆជាតិនិងធ្វើឲ្យប៉ះពាល់ដល់ក្រុមអ្នកភូមិមិនអាចប្រកបរបរនេសាទជាលក្ខណៈគ្រួសារបាន។

លោក អ៊ុក សាវ៉ាត តំណាងសហគមន៍នេសាទភូមិកាច់រទេះក្នុងឃុំកំពង់ព្រៀង បានថ្លែងទទួលស្គាល់ថា ពិតជាមានបទល្មើសនេសាទកើនឡើងមែន ៖ «អ្នកដាក់ណររ៉ាវ គឺសុទ្ធតែអ្នកមកពីក្រៅ មិនមែនអ្នកភូមិយើងទេ»។

ទាក់ទងទៅនឹងការទាមទាររបស់ក្រុមអ្នកភូមិនេះ លោក ង៉ែត សឿ មេឃុំកំពង់ព្រៀង បានថ្លែងថា អាជ្ញាធរឃុំបានយល់ព្រមតាមការទាមទាររបស់ភូមិ ដោយបានកំណត់យកថ្ងៃទី២៣ ខែកញ្ញា ចុះបង្ក្រាបបទល្មើសនេសាទរួមគ្នា ៖ «អាជ្ញាធរនិងសមត្ថកិច្ចគឺចូលរួមលើការងារការពារផ្លូវច្បាប់ ការពារសុវត្ថិភាពហើយ ស្បៀងអាហារមួយចំនួន ព្រមទាំងមធ្យោបាយមួយចំនួនទៀត»។

ទោះយ៉ាងណា គេមិនឃើញមានវត្តមានមន្ត្រីជលផលទៅបង្ហាញមុខ ខណៈដែលអ្នកភូមិធ្វើការតវ៉ានេះទេ។

លោក ហេង ពិសិដ្ឋ នាយខណ្ឌរដ្ឋបាលជលផលខេត្តបាត់ដំបង ធ្លាប់បានអះអាងថា ការចុះបង្ក្រាបបទល្មើសនេសាទនៅព្រៃរនាមក្រោម គឺបានធ្វើឡើងចំនួនពីរលើក។

យ៉ាងនេះក្តី ក្រុមអ្នកភូមិបានថ្លែងថា មន្ត្រីជលផល មន្ត្រីឃុំ និងសហគមន៍ដែលចុះទៅបង្ក្រាបបទល្មើសនេសាទនៅភូមិសាស្ត្រខាងលើនេះ នាពេលកន្លងមក គឺមិនមានប្រសិទ្ធភាព។

លោក យិន ម៉េងលី មន្ត្រីស៊ើបអង្កេតនៃសមាគមការពារសិទ្ធិមនុស្សអាដហុក បានថ្លែងថា ការទាមទាររបស់អ្នកភូមិគឺជាការត្រឹមត្រូវ។ ប៉ុន្តែបញ្ហាសំខាន់ គឺស្ថិតនៅលើឆន្ទៈរបស់អាជ្ញាធរចម្រុះខេត្តបាត់ដំបង ដែលមានតួនាទីក្នុងការបង្ក្រាបបទល្មើសនេសាទ ឬពួកគេដឹងហើយធ្វើជាមិនដឹងមិនឮ៕

និពន្ធនាយកកាសែត ឌឹ ឃែមបូឌា ដេលី ត្រូវផ្តន្ទាទោសពីបទផ្សាយព័ត៌មានបរិហារកេរ្តិ៍បន្ត

តុលាការរាជធានីភ្នំពេញបានផ្តន្ទាទោសនិពន្ធនាយកកាសែត ឌឹ ឃែមបូឌា ដេលី (The Cambodia Daily) និងអ្នកយកព័ត៌មានមា្នក់ទៀត ក្រោមបទផ្សាយព័ត៌មានបរិហារកេរ្តិ៍បន្ត។

តុលាការរាជធានីភ្នំពេញនៅថៃ្ង២២ កញ្ញា បានប្រកាសសាលក្រមផ្តន្ទាទោស លោក ខេវិន ដូល (Kevin Doyle) ជានិពន្ធនាយកនៃកាសែត ឌឹ ឃែមបូឌា ដេលី (The Cambodia Daily) និងអ្នកយកព័ត៌មានមា្នក់ទៀត គឺលោក ណៅ វ៉ាន់ណារិន ដោយផាកពិន័យជាប្រាក់ចំនួនម្នាក់ៗ៤លានរៀល ក្រោមបទផ្សាយព័ត៌មានបរិហារកេរ្តិ៍បន្ត ប៉ុន្តែតុលាការដដែលបានប្រកាសលើកលែងការចោទប្រកាន់លើលោក ហូ វ៉ាន់ តំណាងរាស្រ្តបក្សសមរង្ស៊ី។

លោក សិន វិសាល ជាចៅក្រមជម្រះក្តីនៃតុលាការសាលាដំបូងរាជធានីភ្នំពេញ បានអានសាលក្រមថា តុលាការផ្តន្ទាទោសលោក ខេវិន ដូល អាយុ៤១ឆ្នាំ និងលោក ណៅ វ៉ាន់ណារិន អាយុ២៦ឆ្នាំ ដោយពិន័យជាប្រាក់ម្នាក់ៗ៤លានរៀលក្រោមបទផ្សាយព័ត៌មានបរិហារកេរ្តិ៍បន្ត កាលពីថៃ្ងទី២១ ខែមេសា ឆ្នាំ២០០៩កន្លងទៅ។

ចៅក្រមដដែលបានប្រកាសសាលក្រមបន្តទៀតថា តុលាការលើកលែងការចោទប្រកាន់លើលោក ហូ វ៉ាន់ អាយុ៦២ឆ្នាំ ឲ្យរួចផុតពីការចោទប្រកាន់ក្រោមបទបរិហារកេរ្ដិ៍។

លោក ជា ប៉ូច តំណាងរាស្រ្តខាងគណបក្សសមរង្ស៊ី ដែលបានចូលរួមតាមដានស្ដាប់ការប្រកាសសាលក្រមនោះ បានមានប្រសាសន៍នៅខាងក្រៅតុលាការថា លោកមានការពេញចិត្តចំពោះសាលក្រមនេះ។

លោក ជា ប៉ូច បានបញ្ជាក់ថា ៖ «ខ្ញុំយល់ឃើញថាគឺជាការល្អ ហើយឆ្ពោះទៅលទ្ធិប្រជាធិបតេយ្យនៅស្រុកខ្មែរយើង។ ខ្ញុំអម្បាញ់មិញនេះ ខ្ញុំបានទូរស័ព្ទទៅសហការីដើម្បីប្រាប់ថា បញ្ជូនព័ត៌មានទៅលោក ហូ វ៉ាន់ ភ្លាម ដើម្បីឲ្យលោក ហូ វ៉ាន់ វិលត្រឡប់មកប្រទេសកម្ពុជាវិញ»។

លោក ខេវិន ដូល និពន្ធនាយកនៃកាសែត ឌឹ ឃែមបូឌា ដេលី បានមានប្រសាសន៍ថា លោកគ្មានអត្ថាធិប្បាយអី្វទេជុំវិញរឿងនេះ។

លោក អំ សំអាត ជាប្រធានផែ្នកស៊ើបអង្កេតនៃអង្គការសិទ្ធិមនុស្សក្រៅរដ្ឋាភិបាលមួយ ហៅកាត់ថា លីកាដូ បានថែ្លងថា ៖ «ឲ្យលោក ហូ វ៉ាន់ រួចខ្លួនពីការចោទប្រកាន់ នេះជាការត្រឹមត្រូវ ហើយមួយទៀតគឺការសម្រេចឲ្យនិពន្ធនាយក ខេមបូឌា ដេលី ក៏ដូចជាអ្នកយកព័ត៌មាន ខេមបូឌា ដេលី ផ្តន្ទាទោសដោយសងជាប្រាក់៤លានរៀលនេះ យើងឃើញថា វាមិនមែនជាភាពយុត្តិធម៌សម្រាប់អ្នកទាំងពីរទេ»។

រីឯលោក ចាន់ សុវ៉េត ជាមន្រ្តីស៊ើបអង្កេតនៃអង្គការការពារសិទ្ធិមនុស្សអាដហុក បានថែ្លងថា ៖ «ប៉ុន្តែយើងសោកស្ដាយចំពោះការដាក់ពិរុទ្ធ ដាក់ពិន័យទៅលើអ្នកសារព័ត៌មាន នេះជាហេតុមួយធ្វើឲ្យសារព័ត៌មានយើងជួបប្រទះនូវបញ្ហាដែរ។ គួរតែមានការប្រុងប្រយ័ត្នទុកជាមេរៀនមួយសម្រាប់ឲ្យក្រុមអ្នកសារព័ត៌មានយើងត្រូវតែទទួលខុសត្រូវចំពោះបញ្ហាហ្នឹង»។
ការប្រកាសសាលក្រមនេះបានធ្វើឡើងក្រោយពីតុលាការសាលាដំបូងរាជធានីភ្នំពេញបានបើកការជម្រះក្តីលើសំណុំរឿងនេះ កាលពីថៃ្ងទី៩ ខែកញ្ញាកន្លងទៅនេះ។

សូមជម្រាបថា លោក ហូ វ៉ាន់ តំណាងរាស្រ្តគណបក្សសមរង្ស៊ី បានរងការប្តឹងពីសំណាក់មន្រ្តីយោធាចំនួន២២នាក់ក្រោមបទបរិហារកេរ្តិ៍ ក្រោយពីរូបលោកបានធ្វើអត្ថាធិប្បាយមួយប្រាប់កាសែត ឌឹ ឃែមបូឌា ដេលី កាលពីថៃ្ងទី២០ ខែមេសាកន្លងទៅ ដោយចោទប្រកាន់ថា សញ្ញាបត្រដែលមន្រ្តីយោធាទាំងនោះបានបញ្ចប់ការសិក្សានៅក្នុងប្រទេសវៀតណាម គឺគ្មានតម្លៃនិងគុណភាពទេ។ ក្រោយមកលោកបានសុំទោសពីរឿងនេះ ហើយបានសុំឲ្យមានផ្សាយកែតម្រូវ។

រីឯកាសែត ឌឹ ឃែមបូឌា ដេលី ដែលបានដកស្រង់សម្ដីមកចុះផ្សាយនោះបានរងការប្តឹងផងដែរក្រោមបទផ្សាយព័ត៌មានបរិហារកេរ្តិ៍បន្ត។

ហូ វ៉ាន់ អំពាវនាវឲ្យមានការលើកលែងទោសអ្នកសារព័តមាន
អ្នកតំណាងរាស្រ្ដ ហូ វ៉ាន់ នៃគណបក្សសមរង្ស៊ី បានសម្ដែងសេចក្ដីត្រេកអរ តែក៏បានអំពាវនាវផងដែរឲ្យមានការលើកលែងទោសអ្នកសារព័ត៌មាន។

លោក ហូ វ៉ាន់ បានថ្លែងថា ៖ «ទើបបានដំណឹងពីសេចក្ដីប្រកាសសាលក្រមសាលាដំបូង រាជធានីភ្នំពេញ ក្នុងករណីរបស់ខ្ញុំបាទ នៅឯក្រៅប្រទេសនេះ មានសេចក្ដីត្រេកអរជាអតិបរិមា ហើយក៏សុំបញ្ជាក់ថែមដែរ គឺខ្ញុំពុំបានធ្វើការសុំទោសទេ នោះគឺយើងខ្ញុំធ្វើការកែតម្រូវក្នុងកាសែត ឃែមបូឌា ដេលី ដែលតុលាការសាលាដំបូង យកបញ្ហានេះយកមកវិភាគបានត្រឹមត្រូវ ហើយធ្វើការវិនិច្ឆ័យដោយយុត្តិធម៌។ ប៉ុន្តែខ្ញុំសូមអំពាវនាវដល់តុលាការសាលាដំបូងជួយសម្រួលយ៉ាងណាឲ្យលោក ខេវិញ ដូល និងលោក នៅ វណ្ណារិន កាសែត ខេមបូឌា ដេលី បានរួចខ្លួនដែរ ពីព្រោះគាត់បានកែតម្រូវក្នុងព័ត៌មានរបស់គាត់»។

លោក ហូ វ៉ាន់ ក៏បានបញ្ជាក់ផងដែរថា ក្រោយបានទទួលសាលក្រមនេះហើយ លោកនឹងអញ្ជើញត្រឡប់មកមាតុប្រទេសវិញ៕

Tuesday, September 15, 2009

សមត្ថកិច្ចខែត្រកំពង់ធំតាមចាប់ជនសង្ស័យបាញ់ សម្លាប់សកម្មជនបក្សសមរង្ស៊ី

សមត្ថកិច្ចនគរបាលនៅស្រុកស្ទោង ខេត្តកំពង់ធំ បានអះអាងថា គេបានទទួលដីកាពីតុលាការខេត្តហើយដើម្បីស្វែងរកចាប់ខ្លួនជនសង្ស័យម្នាក់ដែលសមត្ថកិច្ចបានកំណត់មុខសញ្ញាថាបានបាញ់សម្លាប់សកម្មជនបក្សសមរង្ស៊ី លោក ទូច ហូត កាលពីយប់ថៃ្ង៤ កញ្ញាកន្លងទៅនេះ នៅក្នុងឃុំចំណារលើ ស្រុកស្ទោង។

លោក សឹម ញឿន ជាអធិការរងនគរបាលស្រុងស្ទោង ខេត្តកំពង់ធំ បានមានប្រសាសន៍បញ្ជាក់ប្រាប់វិទ្យុអាស៊ីសេរីតាមទូរស័ព្ទមកថា លោកបានទទួលដីកាតាមចាប់ខ្លួនជនសង្ស័យម្នាក់ ប៉ុន្តែជនសង្ស័យនោះបានរត់គេចខ្លួនពីផ្ទះសម្បែងហើយកាលពីពេលថ្មីៗនេះ ៖ «តែម្នាក់ទេ ប៉ុន្តែយើងឃ្លាំមើលរាល់ថ្ងៃហ្នឹង តាំងពីហ្នឹងមកវាគេចខ្លួនបាត់ទៅ»។

សុខ សេរី ៖ ប៉ុន្តែតាមពិតពីរនាក់? សឹម ញឿន ៖ ពីរ ប៉ុន្តែច្បាស់តែម្នាក់ហ្នឹង។ ឃ្លាំចាំមើលឲ្យតែឃើញនឹងអាលចាប់តែម្ដង។ សុខ សេរី ៖ ចាប់ពីបទអី? សឹម ញឿន ៖ មនុស្សឃាត មិនមែនជារឿងនយោបាយទេ។

លោក ទេព លឹម សមាជិកក្រុមប្រឹក្សាស្រុកស្ទោងខាងគណបក្សសមរង្ស៊ីដែលបានដឹងហេតុការណ៍ឃាតកម្មនោះ បានមានប្រសាសន៍ថា ជនសង្ស័យនៅក្នុងឃាតកម្មនោះគឺមានចំនួនពីរនាក់ ៖ «បើតាមសាក្សីអ្នកស្រុកឃើញ ពីរនាក់ ម្នាក់នាក់ឌុប ហើយម្នាក់នាក់បាញ់»។

សុខ សេរី ៖ តើលោកសំណូមពរយ៉ាងម៉េច? ទេព លឹម ៖ ខ្ញុំអត់មានសំណូមពរអីទេ គ្រាន់តែថា ចង់ឲ្យលោកខាងតុលាការហ្នឹងរកចាប់ខ្លួនឲ្យផង ព្រោះម្ចាស់ផ្ទះហ្នឹងគេអត់មានលទ្ធភាពអីទេ។

លោក ចាន់ សុវ៉េត ជាមន្រ្តីស៊ើបអង្កេតនៃអង្គការការពារសិទ្ធិមនុស្សក្រៅរដ្ឋាភិបាលមួយ ហៅកាត់ថា អាដហុក បានមានប្រសាសន៍ថា ដំណើរស៊ើបអង្កេតរបស់លោកកំពុងតែដំណើរការនៅទ្បើយ។

លោក ចាន់ សុវ៉េត បានមានប្រសាសន៍ថា ៖ «ខាងយើងខ្ញុំមិនទាន់និយាយថា វាជារឿងនយោបាយឬក៏ជារឿងស្អីនៅឡើយទេ ប៉ុន្តែគ្រាន់តែថាយើងបានដឹង ខាងប៉ូលិសគេបានប្រាប់អ៊ីចឹងដែរ ហើយខាងយើងបានធ្វើសេចក្ដីរាយការណ៍មកថា ឃាតករត្រូវបានគេកត់សម្គាល់ហើយ។ ខាងយើងខ្ញុំមិនទាន់បានធ្វើការសន្និដ្ឋានថា តើវាមកពីហេតុផលអ្វីខ្លះ?»។

រីឯលោក ស៊ុន ធន់ ជាសមាជិកក្រុមប្រឹក្សាខេត្តកំពង់ធំនៃគណបក្សសមង្ស៊ី បានមានប្រសាសន៍ថា ៖ «ខ្ញុំសូមអំពាវនាវឲ្យសមត្ថកិច្ចមេត្តាចាប់ឃាតករពិតប្រាកដ ចាប់ឲ្យចំឃាតករពិតប្រាកដ ហើយសូមឲ្យផ្ដន្ទាទោសតាមច្បាប់»។
សូមជម្រាបថា លោក ទូច ហូត អាយុ៤៥ឆ្នាំ ជាសកម្មជនគណបក្សសមរង្ស៊ីនៅក្នុងភូមិគរ ឃុំចំណារលើ ស្រុកស្ទោង ខេត្តកំពង់ធំ ត្រូវបានប្រភពអះអាងថា លោកត្រូវបានឃាតករបិទមុខចំនួនពីរនាក់បានជិះម៉ូតូមកឈប់នៅក្បែរផ្ទះ ហើយបានបាញ់សម្លាប់ចំនួនពីរគ្រាប់ កាលពីយប់ថៃ្ងទី៤ ខែកញ្ញាកន្លងទៅ នៅវេលាម៉ោង៧កន្លះយប់ នៅគ្រាដែលរូបលោកនិងក្រុមគ្រួសារអង្គុយទទួលទានបាយជុំគ្នានៅក្នុងផ្ទះ។

គណបក្សសមរង្ស៊ីបានចេញសេចក្តីថែ្លងការណ៍មួយកាលពីថៃ្ងទី៥ ខែកញ្ញាកន្លងទៅនេះ ថ្កោលទោសអំពើឃាតកម្មនោះ៕

ទាហានថៃចូលសង់ខ្ទមលើបន្ទាត់ព្រំដែន នៅជាប់ច្រកជប់គគីរ

កងយោធារក្សាព្រំដែនខ្មែរនៅឃុំអំពិល ស្រុកបន្ទាយអំពិល ខេត្តឧត្តរមានជ័យ បានឲ្យដឹងថា គេកំពុងព្យាយាមបណ្តេញកងទាហានឈុតខ្មៅថៃចំនួន១៥នាក់ ដែលបានចូលមកសាងសង់ខ្ទម៦ខ្នងនៅតំបន់ព្រំដែនដែលមិនទាន់ដាច់ស្រេចនៅជាប់ច្រកជប់គគីរ ឲ្យរុះរើនិងចាកចេញទៅវិញត្រឹមថ្ងៃច័ន្ទទី១៤ ខែកញ្ញា។

កងកម្លាំងរក្សាព្រំដែនខ្មែរមួយរូបប្រចាំច្រកប៉ុស្តិ៍ជប់គគីរនោះ ដែលសុំមិនបញ្ចេញឈ្មោះបានមានប្រសាសន៍កាលពីព្រឹកថ្ងៃច័ន្ទ ទី១៤ ខែកញ្ញាថា ទាហានឈុតខ្មៅថៃចំនួន១៥នាក់បានចូលមកសង់ខ្ទមចំនួន៦ខ្នងនៅលើបន្ទាត់ព្រំដែន ដែលមិនទាន់ដាច់ស្រេចតាំងពីថ្ងៃទី១១ ខែកញ្ញាមកម៉្លេះ។

កងរក្សាព្រំដែនខ្មែរដដែលបានហៅសកម្មភាពរបស់ទាហានឈុតខ្មៅថៃទាំងនោះថា ជាការរំលោភលើអនុស្សរណៈនៃការយោគយល់គ្នាស្តីពីបញ្ហាព្រំដែន ដែលរដ្ឋាភិបាលខ្មែរ-ថៃបានចុះហត្ថលេខាជាមួយគ្នាកាលពីឆ្នាំ២០០០កន្លងមក ហើយកងរក្សាព្រំដែនខ្មែរបានដាក់កំហិតឲ្យទាហានថៃឈុតខ្មៅទាំងនោះរុះរើខ្ទមនិងចាកចេញឲ្យអស់ត្រឹមថ្ងៃច័ន្ទនេះ ៖ «ទាហានឈុតខ្មៅ មកធ្វើផ្ទះ ១៥នាក់ ខ្ញុំទៅចរចាគ្នាឲ្យរើថ្ងៃនេះ ប៉ុន្តែខ្ញុំអត់ទាន់បានទៅមើល ព្រោះខ្ញុំត្រូវវេន[បិណ្ឌ]ក្នុងវត្ត ខ្ញុំក៏មកធ្វើបុណ្យនៅវត្តសិន»។

ជំនួយការរបស់អភិបាលខេត្តឧត្តរមានជ័យ លោក ឈឹម ស៊ីវុធ បានមានប្រសាសន៍ថា ទាហានឈុតខ្មៅថៃទាំង១៥នាក់នោះនៅក្នុងអង្គភាពកងរយលេខ២១០៧ បានមកសង់ជម្រកនៅលើបន្ទាត់ព្រំដែនដែលមិនទាន់ច្បាស់លាស់ ហើយកងរក្សាព្រំដែនខ្មែរបានដាក់កំហិតនៅពេលជួបចរចាគ្នា កាលពីថ្ងៃទី១២ ខែកញ្ញាមកថា យ៉ាងយូរត្រឹម៥ថ្ងៃគឺឲ្យទាហានថៃទាំងនោះរុះរើឲ្យអស់និងដកកម្លាំងចាកចេញទៅវិញ។

លោក ឈឹម ស៊ីវុធ ថ្លែងយ៉ាងដូច្នេះ ៖ «ថៃមួយក្រុមនៅក្នុងកងរយលេខ២១០៧ បានមកសង់ជម្រកនៅលើបន្ទាត់ព្រំដែនដែលមិនកំណត់ច្បាស់លាស់ ហើយកម្លាំងយើងបានឃាត់និងឲ្យវារុះរើ ដោយយើងដាក់ខឲ្យវា ៥ថ្ងៃយ៉ាងយូរគិតពីថ្ងៃចរចាកាលពីថ្ងៃទី១២[កញ្ញា]ហ្នឹងមក»។
មន្ត្រីព្រំដែនខ្មែរបានឲ្យដឹងថា នៅពេលចរចាក្រុមទាហានថៃទាំងនោះបានយល់ព្រមទទួលយកការដាក់លក្ខខណ្ឌរបស់ខ្មែរ ក៏ប៉ុន្តែគេនៅរង់ចាំមើលថាតើទាហានថៃទាំងនោះនឹងចាកចេញពីចំណុចព្រំដែនមិនទាន់ដាច់ស្រេចនោះដូចដែលពួកគេសន្យាឬយ៉ាងណានោះ៕

សាលាឧទ្ធរណ៍បង្វិលសំណុំរឿង ជា វិជ្ជា ឲ្យសាលាដំបូង រាជធានីភ្នំពេញ ស៊ើបបន្ថែម

តុលាការសាលាឧទ្ធរណ៍បានសម្រេចបង្វិលសំណុំរឿងជាផ្លូវការហើយកាលពីដើមសប្តាហ៍កន្លងទៅនេះទៅតុលាការសាលាដំបូងរាជធានីភ្នំពេញ ដើម្បីបើកកិច្ចស៊ើបអង្កេតបន្ថែមទៀតលើសំណុំរឿងឃាតកម្មលើ លោក ជា វិជ្ជា អតីតប្រធានសហជីពសេរីកម្មករកម្ពុជា កាលពីខែមករា ឆ្នាំ២០០៤។

លោក ជួន ស៊ុនទ្បេង ជាអនុប្រធាននៃតុលាការសាលាឧទ្ធរណ៍ និងជាចៅក្រមផងដែរនោះ បានមានប្រសាសន៍បញ្ជាក់ប្រាប់វិទ្យុអាស៊ីសេរីថា ៖ «បង្វិលទៅពីថ្ងៃច័ន្ទឲ្យចៅក្រមស៊ើបសួរ ព្រោះគេមានកម្លាំងប៉ូលិស ប៉េអឹមច្រើន។ អានេះតាមសាលដីកាកំពូលទេ»។

សុខ សេរី ៖ បង្វិលហ្នឹងដើម្បីឲ្យស៊ើបឡើងវិញឬក៏កាត់ឡើងវិញ? ជួន ស៊ុនឡេង ៖ ស៊ើបតើ! ស៊ើបបានលទ្ធផលម៉េចៗគេបញ្ជូនមកឲ្យខ្ញុំ ខ្ញុំពិនិត្យ ខ្ញុំជម្រះតែម្ដង។

លោក សុខ សំអឿន ដែលកំពុងតែរស់នៅក្រៅឃុំជាបណ្តោះអាសន្ន ដូចលោក ប៊ន សំណាង ផងដែរនោះ បានថែ្លងថា លោកសុំឲ្យការស៊ើបអង្កេតនោះប្រកបដោយភាពច្បាស់លាស់និងតម្លាភាព។

លោក សុខ សំអឿន បានបញ្ជាក់ថា ៖ «សម្រាប់រូបខ្ញុំ ខ្ញុំសុំឲ្យគេធ្វើឲ្យបានត្រឹមត្រូវ ឲ្យមានតម្លាភាព ឲ្យក្នុងសង្គមទទួលបានយុត្តិធម៌ ព្រោះខ្ញុំមិនបានប្រព្រឹត្តផង»។

រីឯលោក ប៊ន សំណាង បានថែ្លងថា ៖ «សំណូមពររបស់ខ្ញុំគឺគ្មានអីក្រៅពីចង់បានយុត្តិធម៌ទេ»។

លោក អំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សក្រៅរដ្ឋាភិបាលមួយ ហៅកាត់ថា លីកាដូ ដែលបានតាមដានសំណុំរឿងនេះកន្លងមក បានមានប្រសាសន៍ថា ៖ «យើងស្វាគមន៍ហើយយើងសង្ឃឹមថា សាលាដំបូងរាជធានីភ្នំពេញនឹងធ្វើការស៊ើបអង្កេតដោយហ្មត់ចត់ស្វែងរកឃាតករពិតដើម្បីយកមកផ្ដន្ទាទោសទៅតាមផ្លូវច្បាប់ ដោយធ្វើការលើកលែងទៅដល់លោក ប៊ន សំណាង និងលោក សុខ សំអឿន ដែលយើងជឿជាក់ថា មិនមែនជាឃាតករនៅក្នុងការបាញ់សម្លាប់ លោក ជា វិជ្ជា នេះ»។

នៅមិនទាន់មានប្រតិកម្មបំភ្លឺនៅទ្បើយទេពីមន្រ្តីតុលាការសាលាដំបូងរាជធានីភ្នំពេញជុំវិញការទទូចខាងលើនេះ ប៉ុន្តែលោកឧត្តមសេនីយ៍ឯក ខៀវ សុភ័គ ជាមន្រ្តីអ្នកនាំពាក្យរបស់ក្រសួងមហាផៃ្ទ បានមានប្រសាសន៍ថា សមត្ថកិច្ចស្វាគមន៍ក្នុងការបើកកិច្ចស៊ើបអង្កេតបន្ថែមនោះ។

សូមជម្រាបថា លោក ប៊ន សំណាង និងលោក សុខ សំអឿន ត្រូវបានតុលាការសាលាដំបូងរាជធានីភ្នំពេញ ផ្តន្ទាទោសកាលពីខែសីហា ឆ្នាំ២០០៥កន្លងទៅ ឲ្យជាប់គុកម្នាក់ៗ២០ឆ្នាំ ក្រោមបទចោទថាបានបាញ់សម្លាប់លោក ជា វិជ្ជា អតីតប្រធានសហជីពសេរីកម្មករកម្ពុជា កាលពីថៃ្ងទី២២ ខែមករា ឆ្នាំ២០០៤កន្លងទៅ នៅក្នុងទីក្រុងភ្នំពេញ។

ក្រោយមកតុលាការកំពូលនៃប្រទេសកម្ពុជាបានសម្រេចកាលពីថៃ្ងទី៣១ ខែធ្នូ ឆ្នាំ២០០៨កន្លងទៅ ឲ្យដោះលែង លោក ប៊ន សំណាង និងលោក សុខ សំអឿន ឲ្យរស់នៅក្រៅឃុំជាបណ្តោះអាសន្ន ហើយបានបង្គាប់ឲ្យតុលាការសាលាឧទ្ធរណ៍ចាត់របៀបជាថ្មីក្នុងការស៊ើបអង្កេតបន្ថែម បន្ទាប់ពីតុលាការនេះបានតម្កល់សាលក្រមរបស់តុលាការក្រុងភ្នំពេញនោះចាត់ទុកជាបានការ។

លុះដល់ថៃ្ងទី១៧ ខែសីហាកន្លងទៅនេះ តុលាការសាលាឧទ្ធរណ៍បានសម្រេចឲ្យអ្នកទាំងពីរបន្តការរស់នៅក្រៅឃុំតទៅទៀត ហើយបានប្រកាសបង្គាប់ឲ្យមានការស៊ើបអង្កេតបន្ថែមចំពោះការចន្លោះប្រហោងក្នុងការស៊ើបអង្កេតកន្លងមក។

ការដោះលែងនោះបានធ្វើឡើងក្រោយពីការទទូចទាមទាររបស់ក្រុមអង្គការសង្គមស៊ីវិលជាតិនិងអន្តរជាតិ ដែលតែងតែចាត់ទុកថា លោក ប៊ន សំណាង និងលោក សុខ សំអឿន នោះ គឺជាឃាតករសិប្បនិម្មិត៕